“Өнөөгийн ертөнцийг үндэслэгч Чингис хаан” номын зохиогч Монголд иржээ

Ерөнхийлөгч У.Хүрэлсүхийн урилгаар АНУ-ын монголч эрдэмтэн, Макалестер коллежийн Эмерит профессор Жак Уэтерфорд өнөөдөр Монголд ирсэн байна. Монголчууд түүнийг “Өнөөгийн ертөнцийг үндэслэгч Чингис хаан” хэмээх номын зохиогч гэдгээр нь сайн мэддэг.

Тодруулбал, Жак Уэтерфордын 2004 онд бичин хэвлүүлсэн “Өнөөгийн ертөнцийг үндэслэгч Чингис хаан” ном нь олон улсад танигдаж, одоогоор 20 гаруй улсын хэлээр орчуулагдаад байна.

Тус ном нь хэвлэгдсэн ондоо “Нью-Йорк Таймс” сонины хамгийн их борлуулалттай номын жагсаалтад хоёр долоо хоногийн турш багтсан бөгөөд 300 мянга гаруй хувь зарагджээ.

Мөн Амазоны 2011 оны аудио номын уралдааны ялагчаар тодорсон хоёр номын нэг болж, тухайн жилээ CNN сувгийн долоо хоногийн шилдэг номоор шалгарсан байна. Уг ном сүүлд 2014 оны аравдугаар сарын 12-ны өдөр “Нью-Йорк Таймс” сонины цахим номын жагсаалтын зургадугаарт эрэмбэлэгджээ.

Жак Уэтерфорд нь 2010 онд “Монголын их хатдын нууц товчоон”, 2016 онд “Чингис хаан ба бурхны эрэлд: Дэлхийн хамгийн шилдэг эзэн хаан хэрхэн бидэнд шашны эрх чөлөөг өгсөн нь” бүтээлийг тус тус туурвисан. “Монголын их хатдын нууц товчоон” ном бол Чингис хааны охидын талаар бичсэн анхны ном юм.

Холбоотой мэдээлэл
2 Comments
  1. Anonymous says

    Энэ гадаад эрдэмтэн монголын олон эрдэмтэн хийгээгүй бүтээл туурвисан юм билээ. Төрийн хишиг хүртэх нь аргагүй байх аа.

  2. Зочин says

    Жак Уэтерфорд гуайд Чингис хаан одон өгөх болсон нь маш зөв шийдвэр байна. Дэлхийд Их хааныг маань хатад охидуудтай нь алдаршуулж өгсөн гайхамшигтай хүн баяр хүргэе
    Эрдэнэт хүний, олон хүүхдийн амь аварсан Б.Болдсайхан эмчдээ хөдөлмөрийн баатар цол олговол агуулга нь зохицно.

Comments are closed.