СХД-ийн 24, 40, 42 дугаар хороонд хөрсний ус ихээр гарч, нийтийн эзэмшлийн зам талбай, айл өрхийн хашаанд халиа, дошин үүсч нөхцөл байдал хүндэрчээ

Сонгинохайрхан дүүргийн 24, 40, 42 дугаар хорооны нутаг дэвсгэрт хөрсний ус ихээр гарч, нийтийн эзэмшлийн зам талбай, айл өрхийн хашаанд халиа, дошин үүсч нөхцөл байдал хүндэрчээ.
Өчигдөр /2021.02.18/ Сонгинохайрхан дүүргийн тохижилт үйлчилгээний хэлтэс болон дүүргийн Онцгой байдлын хэлтсийн ажилчид нөхцөл байдал хүндэрсэн хороодод ажиллав.
Ажлын хэсэг гурван айлын хашаан дотроос булаг гарснаар нийтийн эзэмшлийн зам талбай, хашаан дотор их хэмжээний мөс үүссэнийг ачих, дулаарч мөс их хэмжээгээр хайлж урсахаас өмнө зохих газарт зөөвөрлөхөөр болов.
Мөн дүүргийн тохижилт үйлчилгээний хэлтэс, онцгой байдлын газрын мэргэжилтнүүд халиа, дошин үүссэн айл өрхүүдийн гишүүдтэй уулзаж, нөхцөл байдал хүндэрсэн шалтгаан, цаашид асуудлыг хурдан хугацаанд шийдвэрлэж болох газар чөлөөлөх санал, шийдлийг зөвлөлөө.
Нийслэлийн хэмжээнд жил бүр гэр хорооллын айл өрхүүдийн дунд халиа дошин үүссэнээс болж гудамж, зам талбай хөлдөж, усанд автах асуудал үүсдэг. Үүний шалтгаан нь байгалийн хүчин зүйлээс шууд хамааралтай юм. Учир нь булгийн ус тухайн жилийн ундарга, экосистемийн өөрчлөлтөөс шалтгаалж газрын хөрснөөс нэвчин гарч ирдэг.
Мөн хашаа, гудамж талбайд нь халиа дошин үүссэн айлуудын ихэнх нь булгийн эхэнд зөвшөөрөлгүй буусан байдаг. Үүнээс болж булгийн усны голдирол алдагдаж, айл өрх усанд автах асуудлууд үүсдэг. Мөн зарим хороодын нутаг дэвсгэрийг том хэмжээгээр дамнасан булгийн устай газар ч олон байдаг. Энэ нь жил бүр халиа, дошин үүсэх хамгийн том шалтгаан болдог талаар албаныхан хэллээ.

Холбоотой мэдээлэл

Сэтгэгдэл үлдээх

АНХААРУУЛГА: Уншигчдын бичсэн сэтгэгдэлд www.Ugluu.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 315090 утсаар хүлээн авна.