Өглөө.мн Шинэ өглөө, Шинэ мэдээлэл
Жүжигчин Ц.Алдармаа өөрийн амьдралаас сэдэвлэн “Эхиймаа” уран сайхны кино бүтээжээ.
Хамтлагийнхаа жүжигчинтэй маргалдсан асуудалд буруутгагдаж, хорих ялаар шийтгүүлж байсан жүжигчин Ц.Алдармаа өөрийн сошиал хуудаснаа анх удаа энэ хөндүүр сэдвээ ил гаргаж, кино бүтээснээ дуулгалаа.
Тэрбээр“Би аавыгаа зовоосон өөдгүй охин. Ээж, аавынхаа харцанд нь гунигийн сүүдэр суулгаж таныхаа ч туулж үзээгүй хэцүү нэртийн хаалгыг татаж зүрхийг нь базлуулж нүдийг нь нулимсаар бүрхүүлсэн муу охин. “Амьдын хагацал гэж үхсэний хагацалаас ч хэцүү байдгын байна ” гэж аав минь шагширч суусан гэдэг. Гэхдээ ааваа: Та минь байсан болохоороо л охин нь өндийсөн юм шүү. Таны минь бусдад тусалж, сайхан сэтгэлээр ханддаг байсны хүчээр охин нь өдий зэрэгтэй явна аа.
Ээжийгээ би зовоосон муу охин. Бүтэн нойрыг нь мартуулж дэр нойтон хонуулсан тэдгээр өдрүүдэд зүрхнийхээ эмэнд л найдаж охиныхоо төлөө “Би босох ёстой” гэж шүд зуусан бурхан минь та шүү дээ. Ээж минь та үрээ гээгүй бол охин нь өнөөдөр босох байсан гэж үү? Үгүй үгүй. Таныхаа сэтгэлээр, өргөсөн сүүгээр тань , аягалж тавьсан хоолоор тань би тэндээс дуудагдсан. Би дахиж таныгаа зовоохгүйг хичээнэ ээ. Амьдралд ам гарч болдоггүйг охин нь биеэр мэдсэн ч зөв хүнтэй нөхөрлөж зөв амьдрахын төлөө зүтгэнэ.
Би хүүгийнхээ зүрхийг бэтгэрүүлсэн муу ээж. Өвөөгийнхөө үгэнд орж хоолоо сайн идээд, эмээгийнхээ үгэнд орж эрт унтсан ч өглөө нь ирээгүй л байсан ижий нь. Өөдөсхөн хоёр гараараа алга хавсран залбирч “Ээжийг минь л миний дэргэд авчирвал өөр юу ч хүсэхгүй” гэж ухаанаа усалсан жаахан зүрх минь. Хүү минь чи наддаа амьд явах итгэл найдварыг өгсөн үнэт эрдэнэ минь шүү. Ээж нь чинийхээ төлөө л боссон бас тэмцсэн.Үхье гэж бодоход үр минь даанч харам юм билээ.
Би хайртай дотныхоо олон олон хүмүүсээ зовоосон муу эмэгтэй. Сэтгэлээрээ зүтгэлээрээ хамт байж дэмнэж босгосон та нартаа би баярладаг. Өвдөг сөхөрч өндийх тэнхэлгүй болсон надад таяг минь болсон та хэд минь. Та нартаа би өртэй.
Залуу байхад дэлхий бага би том байж гэдэг шиг амьдралын олон өнгийг би гадарлаагүй явжээ. Тийм ээ, би заримдаа боддог. Хүнд чинь уулзаж болохгүй хүн, учирч болохгүй амраг, итгэж болохгүй найз гэж үнэхээр байдаг юм байна лээ. Инээсэн бүхэн нөхөр биш, уурласан бүхэн дайсан биш гэдгийг ойлгосоор л явна даа би.
Миний туулсан энэ алдааг мянга мянган эмэгтэйчүүд бүсгүйчүүд дүү нар минь битгий үзээсэй гэсэндээ өөрийнхөө бодит амьдралаас сэдэвлэж “Эхиймаа” уран сайхны киногоо хийсэн билээ” хэмээн бичжээ.
“Эхиймаа” киноны найруулагчаар “Аравт”, “Чингисийн хүүхдүүд” МУСК зэрэг чансаатай бүтээлүүдээр хэдийн үзэгчдийн танил болсон, чадварлаг туршлагатай найруулагч МУСТА Д.Золбаяр ажиллажээ. Харин киноны зохиолыг Г. Буянцогт бичсэн байна.
Тэгвэл энэхүү киноны гол дүрд жүжигчин Ц. Алдармаа, МУГЖ Ц.Төмөрхуяг, МУСТА А.Цэгмид, Г.Чулуунцэцэг, С.Сарангэрэл, тоглосон бол туслах дүрд Б.Тэгшжаргал, Д.Солонго, МУСТА, Б.Навчаа, Л.Эрдэнэ-Очир, О.Гэрэлсүх, Б.Эрдэнэчимэг, нар тогложээ.
Сонирхуулахад тус киноны “Би асууя” дууны үг, аяыг “Алтан ураг” хамтлагийн ахлагч, хөгжмийн зохиолч Б.Эрдэнэбат зохиож, дууг “Нисванис” хамтлагийн дуучин Амгаа буюу Л. Энх-Амгалан дуулснаар олны хүртээл болоод буй юм.
