Б.Пүрэвдагва: The Beginning of Fall тоглолтын орлого хөгжлийн бэрхшээлтэй болон шилдэг оюутнуудад тэтгэлэг болж очно

THANKS MAN Төрийн бус байгууллагын тэргүүн Б.Пүрэвдагватай ярилцлаа.

-THANKS MAN Төрийн бус байгууллага нийгмийн хариуцлагынхаа хүрээнд The beginning of Fall тоглолтыг зохион байгуулж, тоглолтын орлогыг оюутнуудад сургалтын тэтгэлэг болгон өгөх юм байна. Энэхүү арга хэмжээг хэзээнээс эхлэн зохион байгуулж эхэлсэн бэ?

-“Хүн бүр сурах эрхтэй” тэтгэлэгт хөтөлбөр 2013 оноос эхлэн хэрэгжиж эхэлсэн.THANKS MAN төрийн бус байгууллага 2017 онд энэ хөтөлбөрт хамтран оролцож Цэцээ гүн ротаракт клуб ТББ болон Монгол Улсын Морин хуурын чуулгатай хамтран ажиллаж сурах хүсэл эрмэлзэлтэй ч төлбөрөө төлөх боломжгүй залууст дэмжлэг үзүүлж эхэлсэн юм. Өнгөрсөн хугацаанд 37 оюутанд энэхүү сургалтын тэтгэлэг буюу төлбөрийн дэмжлэгийг үзүүлсэн байна. Үндсэндээ бол бид “Хүн бүр сурах эрхтэй” хөтөлбөртэй 2017 онд хамтран ажиллахдаа хөгжлийн бэрхшээлтэй оюутнуудад түлхүү энэ тэтгэлгийг олгох бодлого барьж ажилласан. Өөрөөр хэлбэл хөгжлийн бэрхшээлтэй тэр дундаа сонсголын бэрхшээлтэй гэсэн атлаа сурах чин хүсэл эрмэлзэлтэй залууст тэтгэлгийг өгсөн. Эдгээр сонсголын бэрхшээлтэй залуус Их, Дээд сургуульд суралцахад дохионы хэл заах багш нарын шаардлага давхар үүсдэг юм билээ. Тиймээс бид дохионы хэл заах багш нарын нэг жилийн төлбөрийг мөн шийдэж өгч байгаа. Залуусын боловсролыг дэмжих зорилготой уг тэтгэлэгт хөтөлбөр нь нийгмийн идэвхтэй, сурлага амжилтаараа манлайлагч оюутнуудаас гадна хөгжлийн бэрхшээлтэй оюутнуудад олгодгоороо онцлог юм.

-Тоглолт хэзээ хаана болох вэ, Тасалбар борлуулагдаж эхэлсэн үү?

-The beginning of Fall тоглолт 10-р сарын 25, 26-ны өдрүүдэд 19:00 цагаас Тусгаар Тогтнолын ордонд болно.

Морин хуурч, Удирдаач, Хөгжмийн зохиолч Д.Түвшинсайхан уг тоглолтыг удирдах бөгөөд тус чуулгын үе үеийн сор болсон шилдэг бүтээлүүд эгшиглэнэ. Та бүхнийг Монгол улсын ирээдүй болсон залуусыг, боловсролыг дэмжиж дэлхийд хосгүй морин хуурын хөгөөр сонороо мялаан, гэр бүл найз нөхөдтэйгөө нэгэн үдшийг мартагдашгүй өнгөрүүлэхийг урьж байна. Таны хандив ”Хүн бүр сурах эрхтэй” оюутны тэтгэлэгт хөтөлбөрийн санхүүжилтэд хандивлагдана.

-“Хүн бүр сурах эрхтэй” тэтгэлгийн албан ёсны шалгаруулалт хэзээ болох вэ?

-Тэтгэлэг аравдугаар сарын сүүлийн 7 хоногт зарлагдаж хоёр удаагийн сонгон шалгаруулалт хийгдээд 12-р сарын эхний долоо хоногт 10 оюутанд тэтгэлэг олгоно. Тэтгэлэгт тавигдах шаардлага болоод илүү дэлгэрэнгүй мэдээллийг бид удахгүй хүргэх болно.

Санал болгох мэдээ

Дотоодын цэрэг өндөр чадвартай хөдөлгөөнт хүчинтэй болно

Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх Дотоодын цэргийн байгууллагад ажиллалаа. Үндэсний аюулгүй …