Хүүхдийн шүд угаах арга

Шүд цоорох өвчнөөс сэргийлэх гол арга нь амны эрүүл ахуйг сайтар сахих буюу шүдийг өнгөрөөс цэвэрлэж, угаах арга юм. Тиймээс бага насны хүүхдийн шүдийг хэрхэн зөв арчилж, эрүүл амьдралын хэв маягт сургах талаар Нийслэлийн Эрүүл мэндийн газраас эцэг эхчүүдэд зориулан гаргасан энэхүү зөвлөмжийг сонирхоорой.

Хүүхдийн өсөлт-хөгжлийн үе шат бүрт хийгдэх шүд угаах арга:

1. СҮҮН ҮҮДЭН ШҮД ШҮДЛЭХ ҮЕ /1-2 нас/.
Хүүхдийн сүүн шүд дөнгөж шүдлэх үед асран хамгаалагч нь хөвөн самбайгаар хуруугаа ороон буцалсан бүлээн усанд норгон үүдэн шүдний өнгөрийг цэвэрлэж өгнө. Хөвөн савх хэрэглэх арга ч бас бий. Үүний дараа шүдний сойзыг аманд бага багаар хэрэглэх байдлаар хүүхдийг дасгаж эхэлнэ.

2. СҮҮН АРАА ШҮД ШҮДЛЭХ ҮЕ /2-3 нас/

Асран хамгаалагч нь хүүхдийн толгойг өвөр дээрээ байрлуулан сууж, сойзоор шүдийг нь угааж өгнө /хэвтүүлэн угаах арга/. Энэ байрлал нь шүд амыг бүрэн харж хянах боломжтой, хүүхдийг шүдний эмчид үзүүлэх байрлалд дасгах сайн талтай.

3. СҮҮН ШҮДНИЙ ЭГНЭЭНИЙ ҮЕ /3-5 нас/

Хүүхэд өөрөө шүдээ угаах дадал хэвшилтэй болно. Унтахын өмнөх угаалт үр дүнтэй болдог. Асран хамгаалагч нь угаалт бүрийн дараа хянаж, дутуу бол гүйцэд угааж өгнө. Хүүхдийн фтортой шүдний оогоор өдөрт 2 удаа угаана. Ооны хэмжээ: /0.25 гр/

4. БАЙНГЫН ШҮД ШҮДЛЭХ ҮЕ /6-8 нас/

Ялангуяа шүдлэж байгаа 1 дүгээр их араа шүдийг угаах арга чухал ач холбогдолтой. Сургуулийн бага ангийн хүүхдийн хувьд асран хамгаалагч хянаж, дутуу хэсгийг гүйцэд угааж өгөх нь чухал юм. Өнгөр илрүүлэх будагч бодис хэрэглэх нь зүйтэй. Хүүхдийн болон гэр бүлийнхэний фтортой шүдний оогоор өдөрт 2 удаа угаана. Ооны хэмжээ: /0.25 гр/

Хүүхдийн насны онцлогт тохирсон аргаар шүдийг цэвэрлэх болон угаах нь өнгөрийг арилгах буюу цоорол үүсгэгч нянг хянахад маш чухал. Мөн шилэн аяганд ус хийж, сойзоо дүрэн шүдийг цэвэрлэснээр шүдний бохирдлыг хянах, хүүхдэд амны хөндийн эрүүл ахуйг ойлгуулах сайн арга болдог. Эхлээд шүдний өнгөрийг сайтар цэвэрлэж угаасны дараа фтортой оог хэрэглэх нь хамгийн үр дүнтэй.

Санал болгох мэдээ

Вакцины хоёрдугаар тунд 239,971 хүн хамрагджээ

Улсын хэмжээнд өчигдөр буюу 2021.04.26-нд 57.277 иргэн вакцинд хамрагджээ.  Өчигдрийн айдлаар вакцины нэгдүгээр тунд 707 мянга …