УИХ-ын дарга Г.Занданшатар Монголбанкинд зочиллоо

Монгол Улсын Их Хурлын дарга Г.Занданшатар, УИХ-ын Эдийн засгийн байнгын хорооны дарга, УИХ-ын гишүүн Ж.Ганбаатар нар өнөөдөр (2019.05.22) Монголбанкинд зочиллоо.

Монголбанкны Ерөнхийлөгч Н.Баяртсайхан энэ үеэр Монголбанкнаас сүүлийн 3 жилд хэрэгжүүлсэн бодлогын үр дүнд Монголбанкны хуримтлагдсан алдагдал буурч, ГВУН 3.8 тэрбум ам.долларт хүрснээс гадна банкны салбарын голлох хуулиудад өөрчлөлт орж, эрх зүйн шинэчлэлийг эхлүүлсэн, ОУВС-гийн хөтөлбөрийн хүрээнд банкны салбарт бүтцийн өөрчлөлт хийгдсэнийг онцлон тэмдэглэв.

Түүнчлэн Монгол Улс олон улсын мөнгө угаахтай тэмцэх, санхүүгийн хориг арга хэмжээ хэрэгжүүлэх байгууллага ФАТФ-ын саарал жагсаалтад орохоос сэргийлэх, дунд хугацаанд хүлээгдэж буй гадаад өр, төлбөрийг барагдуулах боломжийг бүрдүүлэх арга хэмжээ авах зэрэг сорилтууд хүлээгдэж байгааг онцолсон юм.

УИХ-ын дарга Г.Занданшатар Монголбанкны удирдлагууд болон ажилтнуудтай уулзах үеэрээ Монголбанк улс орны эдийн засгийг сэргээх, өрийн дефолтоос зайлсхийх, эдийн засгийн эмзэг байдлыг бууруулах, банк санхүүгийн салбарыг эрүүлжүүлэх зэрэг чиглэлээр тодорхой үр дүнд хүрснийг тэмдэглээд, удахгүй тохиох гэж буй банкны салбарын 95 жилийн ойн мэндчилгээ дэвшүүлэв.

Мөн УИХ-ын гишүүн, Эдийн засгийн байнгын хорооны дарга Ж.Ганбаатар банк, санхүүгийн салбарын бүтцийн болон хууль, эрх зүйн өөрчлөлтийг цаашид гүнзгийрүүлэх, шаардлагатай хуулиудыг хугацаа алдалгүй батлан гаргах, мөнгөний зөв бодлого явуулах чиглэлээр Төв банктай Байнгын хороо идэвхтэй хамтран ажиллахад бэлэн байгаагаа илэрхийллээ.

Холбоотой мэдээлэл
2 Comments
  1. Иргэн says

    Ажил хийхгүй зочилж , айлчлаад ямар ёс гарч ирэв ээ .Ёстой дүүрчээ , дүүрч.

  2. Anonymous says

    Ханш өсөөд төг навс унаж байхад юун баяр хүргье нтр гэж. Монголчууд үнэнннн хүлцэнгүй юмааа!!!

Сэтгэгдэл үлдээх

АНХААРУУЛГА: Уншигчдын бичсэн сэтгэгдэлд www.Ugluu.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 315090 утсаар хүлээн авна.