Өглөө.мн Шинэ өглөө, Шинэ мэдээлэл
Олон улсын самбо бөхийн холбооноос зохион байгуулдаг А.Харлампиевийн нэрэмжит “Дэлхийн цом”-ын аварга шалгаруулах тэмцээн ОХУ-ын Москва хотын “Лужник” цэнгэлдэх хүрээлэнд болж байна.
Энэхүү тэмцээнд манай улсын тамирчид амжилттай оролцож өнөөдрийн байдлаар нэг алт, нэг мөнгө, хоёр хүрэл медаль хүртээд байна.
Тухайлбал, Эмэгтэйчүүдийн 68 кг-ын жинд хүч үзсэн Ц.Батцэцэг аваргын алтан медаль хүртлээ. Түүний хувьд улсын аварга шалгаруулах тэмцээнд түрүүлснээс хойш олон улсын хоёр тэмцээнд орж аваргын алтан медаль хүртээд байна. Мөн эмэгтэйчүүдийн 52 кг-ын жинд Б.Баасанхүү хүрэл медаль хүртлээ.
Харин эрэгтэйчүүдийн 74 кг-ын жинд Н.Хадбаатар мөнгөн медаль хүртлээ. Тэрбээр аваргын төлөөх барилдаанд Европын хошой аварга ОХУ-ын Куржевт ялагджээ.
90 кг-ын жинд Х.Цагаанбаатар хүрэл медаль хүртлээ. Түүний хувьд өмнө нь самбо бөхийн ДАШТ-ээс алт, мөнгөн медаль хүртэж байсан юм.
