“Үндсэн хуулийн болон Захиргааны эрх зүйн үндсэн асуудал” Олон Улсын эрдэм шинжилгээний хурал болж байна

 “Үндсэн хуулийн болон Захиргааны эрх зүйн үндсэн асуудал” сэдэвт Олон Улсын эрдэм шинжилгээний хоёрдугаар хурлыг 3 дугаар сарын 21, 22-ны өдөр МУИС-ийн Номын сангийн хурлын танхимд зохион байгуулж байна.

    Тус олон улсын эрдэм шинжилгээний хурлыг Монгол Улсын Их сургууль,  Монголын Хуульчдын холбоо, Нагояагийн Их сургууль, Ханнс-Зайделийн сан, Чимид сан, Хууль зүйн үндэсний хүрээлэн зэрэг байгууллага хамтран хоёр дахь жилдээ зохион байгуулж буй юм.

Хуралд Монголын болон гадаадын Үндсэн хууль, захиргааны эрх зүйн тэргүүлэх эрдэмтэн, судлаачид болох МУИС-ийн Хууль зүйн сургуулийн профессорууд, Үндсэн хуулийн цэцийн гишүүн, Улсын дээд шүүх болон захиргааны хэргийн шүүхийн шүүгчид болон Япон улсын Нагояагийн их сургуулийн хууль зүйн сургууль, Их Британийн Кембриджийн их сургуулийн профессорууд оролцож өөрийн судалгааны ажлын үр дүнг танилцуулж, үндсэн хуульт ардчиллын ололт, амжилт, туршлага, тулгамдсан асуудлаасаа хуваалцаж, үр дүнтэй яриа өрнүүлж буйгаараа онцлогтой.

    Монгол Улс 1992 онд өөрийн түүхэндээ анх удаа ардчилсан Үндсэн хуулиа баталж түүнийг дагаж мөрдсөнөөс хойш хорин долоон жил болж байна. 1992 оны Үндсэн хууль нь Монгол Улсад анх удаа хүний үндсэн эрх, эрх чөлөөг бүрэн хэмжээнд баталгаажуулж, төрийн эрх мэдлийг хуваарилж, хяналт, тэнцлийг хангасан юм.

Өнөөдөр Монголчууд үзэл бодлоо чөлөөтэй илэрхийлэх, шашин шүтэх, эвлэлдэн нэгдэх, шударгаар шүүлгэх зэрэг үндсэн эрх, эрх чөлөөгөө эдэлж байна. Мөн, өнгөрсөн хугацаанд 8 удаагийн парламентын, 7 удаагийн ерөнхийлөгчийн сонгуулийг амжилттай явуулж, сонгуулийн үр дүнгээр төрийн эрх мэдлийг олонхоос цөөнхөд тайван замаар шилжүүлж чадсан нь тус улсын улс төрийн соёлын нэг амжилт мөн. Хэдийгээр Үндсэн хууль түүхэн үүргээ гүйцэтгэж ардчилал, хүний эрх, эрх чөлөөний баталгаа болж буй ч түүний үзэл санаа, зарчмыг бүрэн ойлгоогүй эсхүл хэрэгжүүлэхгүй байгаагаас цөөнгүй бэрхшээлүүд үүсэж буй.

    Монгол Улсын Их хурал 2019 оны хаврын ээлжит чуулганы хэлэлцэх асуудлыг дараалалд “Монгол Улсын Үндсэн хуулийн нэмэлт, өөрчлөлтийг хэлэлцэхээр төлөвлөж буйгаа зарласан. Үндсэн хуульд оруулах нэмэлт, өөрчлөлтийн суурь үзэл баримтлал нь өнгөрсөн хугацаанд олж авсан үнэт зүйл болох парламентын ардчилал бүхий хүний эрх, эрх чөлөөг дээдэлсэн байхад чиглэж байна.

Парламентын тогтолцоо бол Монгол Улсын тусгаар тогтнол, ардчилал, хүний эрхийн баталгаа. Өмнөх болон одоогийн УИХ-ын бүрэлдэхүүн парламентын тогтолцоогоо бэхжүүлэх хүрээнд Үндсэн хуульд нэмэлт өөрчлөлт оруулах төслийг боловсруулан хэлэлцэж байгаа энэ үед тус олон улсын хурлыг зохион байгуулж буй нь ач холбогдолтой юм.

    “Үндсэн хуулийн болон захиргааны эрх зүйн үндсэн асуудал” сэдэвт олон улсын эрдэм шинжилгээний анхдугаар хурал маргааш захиргааны эрх зүйн асуудлаар үргэлжилнэ.

 

Санал болгох мэдээ

Жан Тодт:Улаанбаатар хотын замын хөдөлгөөний аюулгүй байдлыг сайжруулж, хамтран ажиллах бүрэн боломжтой

Нийслэлийн Засаг дарга бөгөөд Улаанбаатар хотын Захирагч Х.Нямбаатар өнөөдөр Нэгдсэн Үндэстний Байгууллагын Ерөнхий нарийн бичгийн …