С.Амарсайхан:Франц улстай хамтран ажиллах эхлэл тавигдлаа

Европын холбоо болон түүний гишүүн орнуудаас Монгол Улсад суугаа Элчин сайдуудтай НИТХ-ын дарга С.Амарсайхан өнөөдөр уулзаж, тэдэнд Нийслэлийн тухай ерөнхий мэдээллийг хүргэж, хотын өмнө тулгамдаж байгаа асуудлуудыг шийдвэрлэх боломжийн талаар санал солилцлоо.

Энэ үеэр НИТХ-ын дарга С.Амарсайхан Европын холбооны улсын төлөөлөгчийн газар Монгол Улсад байгуулагдсан, 2017 онд Европын Холбооны Улс олон Монгол Улсын хооронд хамтын ажиллагааны гэрээ байгуулсан. Үүнтэй холбоотойгоор хоёр улсын хамтын ажиллагааг идэвхжүүлэх, худалдаа, эдийн засаг, нийгэм соёл боловсролын хамтын ажиллагааг улам өргөжүүлэх, эдийн засгийн олон талт хамтын ажиллагааг хөгжүүлэхэд эдгээр улс орнуудын туршлагыг судлах, Европын улс орнуудад боловсон хүчнийг сургах зэрэг асуудлаас гадна Нийслэл хотын хөгжлийн бодлогыг зөв зүйтэй явуулахын тулд хот төлөвлөлт, нийтийн тээвэр, дэд бүтцийн салбарыг хөгжүүлэх, нийслэлийн төр засгийн байгууллагуудын ажилтан албан хаагчдын мэргэжлийн ур чадварыг дээшлүүлэхэд Европын улс орнуудаас дэмжлэг туслалцаа үзүүлэх боломж, мөн хот төлөвлөлт судалгааны институтийг байгуулахад Европын холбооны улсуудын туршлагаас судлах шаардлагатай байгааг дурдлаа.

Уулзалтын үеэр НИТХ-ын даргаас Элчин сайдуудтай хийсэн уулзалт арга хэмжээний талаар тодруулга авлаа. Тэрбээр “Өнөөдөр Европын холбооны улс орнуудын Элчин сайдуудтай уулзаж байна. Нийслэл хотын өмнө тулгамдсан асуудлын талаарх ерөнхий мэдээллийг өгч, хамтран ажиллах боломжоо ярилцлаа. Эдгээр улс орнуудтай олон чиглэлд хамтран ажиллах олон боломж бий. Ганцхан жишээг дурьдахад Улаанбаатар хот Франц улсын нийслэл Парис хоттой Хот төлөвлөлтийн чиглэлээр хамтран ажиллах асуудлыг өнгөрсөн 10 сард миний бие Франц улсад айлчлах үеэрээ ярилцсан. Энэ ажлыг Франц Улсын элчин сайдаар дамжуулан ажил хэрэг болгохоор төлөвлөж байна. Манай улсын хувьд нийтийн тээврийн шинэ систем болох Кабел кар буюу Дүүжин тээврийн системийг Нийслэлд нэвтрүүлэх төслийг Франц Улсын сангийн яам 55 сая еврогоор санхүүжүүлэх шийдвэрийг гаргасан байгаа. Парис – Улаанбаатар хот хамтран ажиллах эхлэл тавигдлаа. Мөн бид Улаанбаатар хотод Парис хотын нэрэмжит гудамжийг байгуулахаар төлөвлөн ажиллаж байна” гэв.

Уулзалтын үеэр тус арга хэмжээг санаачлан зохион байгуулсан Европын Холбооны Улсаас Монгол улсад суугаа Онц бөгөөд бүрэн эрхэт Элчин сайд Траян Христеа мэдээлэл өглөө. Тэрбээр “Юуны өмнө Монгол улс- Европын Холбооны Улс хооронд арав дахь жилдээ болж байгаа уулзалт гэдгийг онцлон хэлье. Энэхүү уулзалтаар Монгол улсад итгэмжлэгдсэн сууж байгаа суурин төдийгүй өөр улсад сууж байгаа элчин сайдууд бүгд цуглаад Монгол улсын өмнө ямар асуудал тулгамдаж байгааг сонсож, хамтын ажиллагаагаа өргөжүүлэх талаар санал солилцдог. Энэ төрлийн уулзалтыг хийхийн ач холбогдол нь Европын 27 улсын туршлагыг нэг дор сонсож, санал солилцох боломж олдож байгаа явдал юм. Улс болгоны хотуудад тулгарч байсан бэрхшээлүүдийг хот бүр өөр өөрсдийн туршлагаар шийдвэрлэсэн байдаг. Уулзалтаар дамжуулаад туршлага солилцохын зэрэгцээ хот хоорондын харилцааг шинэ шатанд гаргах боломжтой гэж харж байна” гэлээ.

Уулзалтад Европын Холбоо, Холбооны Бүгд Найрамдах Герман Улс, Бүгд Найрамдах Итали Улс, Бүгд Найрамдах Австри Улс, Нидерландын Хаант Улс зэрэг 28 улсаас Монгол Улсад суугаа Онц бөгөөд Бүрэн Эрхт Элчин сайд нар, мөн Европын Холбооны бусад орнуудын Элчин сайдын яамны төлөөлөл оролцлоо. Уулзалтанд НИТХ-ын Тэргүүлэгчдийн нарийн бичгийн дарга бөгөөд Ажлын албаны дарга Б.Батбямба, НИТХ-ын Тэргүүлэгч Ц.Байгальмаа нар байлцав.

Санал болгох мэдээ

Сүхбаатар дүүрэг: “Томуу, томуу төст өвчний үед авч хэрэгжүүлэх арга хэмжээ” сэдэвт сургалт болов

Өнөөдөр Сүхбаатар дүүргийн Засаг даргын Тамгын газар, Эрүүл мэндийн төв хамтран цэцэрлэг, сургуулийн эмч нарт …