БНСУ-д олон удаа зорчих визний журамд өөрчлөлт орно

БНСУ-д олон удаа зорчих визний журамд нэмэлт оруулж байгаа талаар өнөөдөр тус улсаас Монгол Улсад суугаа Элчин сайдын яамны Консулын хэлстээс мэдээлэв.

Улаанбаатар хот дахь БНСУ-ын ЭСЯ-ны консул Кил Канмүг “БНСУ-руу зорчих визний журамд зөвхөн ЭСЯ дангаараа өөрчлөлт оруулдаггүй, БНСУ-ын Хууль зүйн яам, Гадаадын иргэн харьяатын газар, Цагаачлалын алба зэрэг холбогдох байгууллагуудын хамтарсан шийдвэрээр гаргадаг. Өнөөдрийн байдлаар мянга орчим солонгос иргэн Монголд зорчих олон удаагийн виз авсан бол 37 мянган монгол иргэн БНСУ руу зорчих олон удаагийн виз эзэмшдэг” гэлээ.

Хуучин журмаар олон удаагийн визийг олгохдоо долоон шалгуур хангасан тохиолдолд виз олгодог байсан бол энэ удаагийн шинэчлэлээр нэмж зургаан шалгуурыг тусгахаар болжээ. Өөрөөр хэлбэл,  шинэ журамд нийт 13 шалгууртай болгожээ.

Шинэ журмыг ойрын хугацаанд БНСУ-ын холбогдох байгууллагуудад танилцуулан зөвшөөрөл авч, хэрэгжүүлж эхлэхээр төлөвлөж байгааг гэнэ.

ОДОО МӨРДӨГДӨЖ БУЙ ЖУРАМ:

  1. БНСУ-д зорчиж байсан иргэн
  2. Төрийн албан хаагч болон төрийн өмчит ААН-ийн үндсэн ажилтан (хэлтсийн даргаас дээш албан тушаалтан)
  3. БНСУ-руу тогтмол нислэг үйлддэг авиа компани, усан онгоцны компанийн үндсэн ажилтан (хэлтсийн даргаас дээш албан тушаалтан)
  4. БНСУ-тай хамтран байгалийн баялаг, эрчим хүч олборлох, борлуулах зорилгоор ААН байгуулах, БНСУ-ын төрийн болон төрийн өмчит ААН-ийн урилгаар хэлэлцээр хийх, гэрээ байгуулах зэрэг үйл ажиллагааны шугамаар зорчих иргэн
  5. БНСУ-ын иргэншилтэй болсон иргэний эцэг, эх, хүүхэд, БНСУ-ын иргэний эхнэр, нөхөр, мөн хоёр улсад гэрлэлтээ батлуулаад 1 жил ба түүнээс дээш жил зүй ёсоор амьдарч буй БНСУ-ын иргэний эхнэр/нөхрийн эцэг, эх, насанд хүрээгүй хүүхэд (18-аас доош насны)
  6. Олон улсад ашиглагддаг кредит карт эзэмшигчийн харилцагчийн зэрэглэл болон зарцуулалтаас хамааруулан VIP үйлчлүүлэгч гэж үзсэн иргэн
  7. Байнгын зорчигч – БНСУ-руу сүүлийн хоёр жилийн дотор 4 ба түүнээс дээш, нийт 10-аас дээш (сүүлийн 2 жилд заавал нэг удаа зорчсон байх) зорчсон иргэн

 ШИНЭЧЛЭГДСЭН ЖУРАМ:

Одоо мөрдөгдөж  дээрх долоон журам дээр нэмэгдэн

Холбогдох нөхцөлийг хангаж буй эмч, өмгөөлөгч, их сургуулийн багш зэрэг мэргэжлийн боловсон хүчинд олгох аж.

  1. Холбогдох нөхцөлийг хангаж буй сэтгүүлч, найруулагч, редактор зэрэг хэвлэл мэдээллийн байгууллагад нэг жилээс дээш хугацаагаар ажилласан иргэн
  2. Нэг жилийн турш төлсөн татварын хэмжээ 500 сая төгрөгөөс дээш байх, эсвэл татвар төлөгч аж, ахуйн нэгжийн хэлтсийн дарга болон түүнээс дээш албан тушаалд нэг жилээс дээш хугацаагаар ажиллаж буй иргэн
  3. БНСУ-д бакалавраас дээш зэрэг хамгаалсан иргэн, эсвэл бусад улсад магистраас дээш зэрэг хамгаалсан иргэн (Үүнд коллеж хамаарахгүй)
  4. Холбогдох нөхцөлийг хангаж буй олны танил урлаг соёлын зүтгэлтэн, тамирчин (Тухайн салбарт гавьяа зүтгэл гаргасан иргэн)
  5. 500 сая төгрөгөөс дээш үнэ бүхий үл хөдлөх хөрөнгө, санхүүгийн хөрөнгө зэрэг хувийн хөрөнгө эзэмшиж буй иргэн олон удаагийн виз хүсэх боломжтой болжээ.

ХУГАЦААНЫ ТУХАЙД:

Одоогийн мөрдөж буй журмаар олон удаагийн виз авахад эхлээд нэг жилээр олгоод оршин суух хугацаандаа аливаа зөрчил гаргаж байгаагүй, визний хугацаандаа хоёр ба түүнээс дээш удаа зорчсон тохиолдолд оршин суух хугацаа 90 хоног, визний хүчинтэй хугацаа хоёр жил,  энэ хугацаандаа аливаа зөрчил гаргаж байгаагүй, байнгын зорчигдоод хамаарах иргэн оршин суух хугацаа 90 хоног, визний хүчинтэй хугацаа хоёр жилийн олон удаагийн виз олгодог байв.

Шинэ журамд олон удаагийн визний нөхцөл хангаж буй иргэний гавьяа шагнал, ажилласан жил, эдийн засгийн чадавх мөн оршин суух хугацаандаа аливаа зөрчил гаргаж байгаагүй зэргийг харгалзан үзэж шууд 3 болон 5 жилийн олон удаагийн визийг олгох боломжтой аж.

 

 

Холбоотой мэдээлэл

Сэтгэгдэл үлдээх

АНХААРУУЛГА: Уншигчдын бичсэн сэтгэгдэлд www.Ugluu.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 315090 утсаар хүлээн авна.