Ц.Энхболд: Анкарагийн нэрэмжит гудамжны хожуулыг цэвэрлэн тохижуулсан

Нийслэлийн Чингэлтэй дүүргийн 4-р хороо буюу Анкарагийн нэрэмжит гудамжны тохижилтын ажлын талаар тус дүүргийн ТҮК-ийн ногоон байгууламж хариуцсан инженер Ц.Энхболдоос тодрууллаа.

– Анкарагийн нэрэмжит гудамжны зарим улиасыг тайрч үндсээр нь цэвэрлэжээ. Ямар учраас ийм ажил хийж байгаа юм бэ?

– Гудамжны хоёр талаар 1950–иад оноос эхэлж тарьсан нийт 57 ширхэг улиас бий. Үүнээс ургах чадвар нь илт муудаж, үхэжсэн моддыг 2011-2017 оны хооронд цэвэрлэж, хожуул үлдсэн байсан юм.

Харин энэ хавар өмхөрч муудсан хожуулыг цэвэрлэж оронд нь 1,200 ширхэг гоёлын буйлс тарих ажлыг хийлээ. Бид зөвхөн хожуул цэвэрлэж, орчныг тохижуулж байгаа гэдгийг онцолж хэлье. Гэтэл зарим хүмүүс ургаж байсан модыг булгалчихлаа гэж буруу ташаа ойлгоод байна.

– Модны ёроолыг чулуугаар битүүлсэн байна. Энэ талаар тодруулна уу?

– Модны үндсийг хамгаалах, ус чийг шингэх нөхцөлийг сайжруулах, гудамжны шороо тоосыг бага ч болов багасгах зорилгоор байгалийн чулуу шигтгэж, зүлэгжүүлсэн юм. Ингэснээр усалгаа болон борооны ус бүрэн нэвчихээс гадна чийгээ алдахгүй давуу талтай.

Анкарагийн гудамжинд 11 төрлийн мод, бут болон 1.5 метрийн өндөртэй 365 метр урт ургамлан хашлага, 4,860 м.кв зүлэгт талбай, ногоон байгууламж бий. Бид төлөвлөлтийнхөө дагуу арчлалт, тохижилтын ажлаа тогтмол хийж байгаа.

Бас нийслэлчүүд маань ногоон байгууламжаа нэмэгдүүлэх, мод бут тарих ажилд идэвхтэй оролцох болсон нь бидэнд урам өгч байдаг юм.

 

Холбоотой мэдээлэл

Сэтгэгдэл үлдээх

АНХААРУУЛГА: Уншигчдын бичсэн сэтгэгдэлд www.Ugluu.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 315090 утсаар хүлээн авна.