НМХГ:Сар шинийн худалдан авалт хийхдээ хаяг, шошгыг нь шалгаж авахыг зөвлөж байна

17/02/16 03:00

360 Үзсэн

Нийслэлийн Мэргэжлийн Хяналтын газраас Мэргэжлийн Хяналтын Ерөнхий Газрын даргын баталсан “Урьдчилан сэргийлэх хяналт шалгалт хийх тухай” 01/27 тоот удирдамжийн дагуу нийслэлийн 9 дүүрэгт 02 дугаар сарын 01-ний өдрөөс эхэлж  хүнсний зах, үзэсгэлэн худалдаануудад шалгалт хийжээ. Хүнсний захуудад шагналт хийсэн талаар өнөөдөр мэдээлэл хийлээ.

Хүнсний сүлжээнд оролцогч аж ахуйн нэгж, иргэдэд  хүнсний аюулгүй байдлыг хангуулж ажиллах талаар 5 төрлийн зөвлөмж боловсруулан хяналт шалгалтанд хамрагдаж байгаа аж ахуйн нэгжүүдэд  хүргүүлж ажилласан. Мөн илэрсэн зөрчлүүдийг арилгуулах, болзошгүй эрсдэлээс урьдчилан сэргийлэх, иргэд хэрэглэгчдийг хэрхэн аюулгүй хүнсээр хангах талаар томоохон худалдааны төв, зах, сүлжээ дэлгүүрүүдийн түрээслэгч ажилтнууд  зэрэг 80 аж ахуйн нэгж, 270 ажиллагсдыг хамруулан сургалт зохион байгуулсан.

Шалгалтад худалдаа, үйлдвэр үйлчилгээний 82 аж ахуйн нэгж, худалдаа эрхлэгч 226 иргэн, нийт 308 цэг салбар хамрагдаж, хяналт шалгалтын явцад 265 зөрчил илрүүлэн, үүнээс одоогийн байдлаар 147 зөрчил буюу 55.4 хувийг арилгуулан ажиллаж байна гэж мэдэгдлээ.

 Хяналт шалгалтын явцад илэрсэн зөрчлийг арилгуулах зорилгоор улсын байцаагчийн 205 заалт бүхий 119 албан шаардлага хүргүүлж гүйцэтгэлд нь хяналт тавин ажиллаж байна. Холбогдох хууль тогтоомж зөрчсөн 35 аж ахуйн нэгж, иргэнд 6.060.000 төгрөгийн торгууль шийтгэвэр ногдуулсан байна.

Шалгалтын явцад түгээмэл илэрч байгаа зөрчлүүдээс дурьдвал худалдаа үйлчилгээний ажилчид нь эрүүл мэндийн урьдчилан сэргийлэх үзлэг шинжилгээнд хамрагдаагүй, гарал үүсэл нь тодорхойгүй импортын хүнсний бүтээгдэхүүнүүд, гэрийн нөхцөлд үйлдвэрлэсэн хэвийн боов, хадгалах хугацаа дууссан, хаяг шошгын зөрчилтэй буюу үйлдвэрлэсэн болон дуусах хугацааг бичээгүй, хаяг шошго нь хятад хэл дээр бичигдсэн бүтээгдэхүүн худалдаалж байгаа зөрчлүүд нилээдгүй байлаа.

Тухайлбал:Бөмбөгөр, Эрдэнэбулган, Барс-2 захын лангуунуудад БНХАУ, ОХУ-аас импортлогдсон гарал үүсэл нь тодорхойгүй, хадгалалтын хугацаа дууссан хар чавга, хатаасан үзэм, ястай чангаанз худалдаалсан, түргэн гэмтэх бүтээгдэхүүн болон хиам, зайдсыг үйлдвэрлэсэн болон дуусах хугацааг тавилгүйгээр хүнсний сүлжээнд нийлүүлсэн, мөн Сүхбаатар дүүргийн иргэн н.Од гэртээ хэвийн боов үйлдвэрлэн өөр аж ахуйн нэгжийн нэр дээр савлан Баянгол дүүргийн 16 дугаар хороо, Гандангийн орчимд худалдаалсан зөрчлүүд илэрлээ.

Шалгалтын явцад тусгай зөвшөөрөлгүй худалдаалсан 13 нэр төрлийн 326 ширхэг, 609.0 мянган төгрөгийн тамхийг улсын орлогод оруулахаар, чанар аюулгүй байдлын шаардлага хангаагүй хадгалах хугацаа дууссан 93 нэр төрлийн 807 ширхэг, 229 кг 2.292.750 мянган төгрөгийн хүнсний бүтээгдэхүүнийг устгуулахаар хураан авч, Нийслэлийн Засаг даргын дэргэдэх “Захиргааны журмаар эд зүйлийг хураах, улсын орлого болгох, үнэлэх, устгах үйл ажиллагаанд хяналт тавьж, хэрэгжилтийг хангуулах үүрэг бүхий орон тооны бус зөвлөл”-д шилжүүлсэн.

 Хоол хүнсний хордлого, халдварт хордлогоос урьдчилан сэргийлэх зорилгоор 167 дээж, 30 арчдас авч НМХГ-ын НТЛ-д шинжлүүлэхэд одоогоор эерэг сорьц илрээгүй байна. Шинжилгээний хариу гүйцэд гараагүй байна.

Шошгын зөрчилтэй худалдаалагдаж байсан 23 нэрийн, 20.5 кг, 1055 ширхэг, 2.324.600 төгрөгийн  хүнсний бүтээгдэхүүнийг хүнсний сүлжээнээс татан авалт хийлгүүлж, зөрчлийг арилгуулж, болзошгүй эрсдэлээс урьдчилан сэргийлж ажилласан гэж мэдээллээ.

Сар шинийн баярын өдрүүд буюу 02 дугаар сарын 24-ний өдрөөс 03 дугаар сарын 02-ны өдрүүдэд НМХГ-ын газрын даргын баталсан хуваарийн дагуу улсын байцаагчид хариуцлагатай жижүүрээр ажиллах иргэдийн санал, гомдол, хүсэлтийг Шуурхай албаны 70128012 дугаарын утсаар 24 цагийн турш хүлээн авч, шуурхай арга хэмжээ авч ажиллана.

 

Share Button

Сэтгэгдэлүүд

Сэтгэгдэл 0.

Уншигчдын бичсэн сэтгэгдэлд ugluu.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдлыг 95890049 утсаар хүлээн авна.

Сэтгэгдэл үлдээх


1 + = 6