Өглөө.мн Шинэ өглөө, Шинэ мэдээлэл
Монголын Залуучуудын Холбооны санаачилгаар “Унадаг дугуйтай Улаанбаатар” хөтөлбөр хэрэгжиж эхэлснээр сүүлийн хоёр жилийн хугацаанд дугуйн хэрэглээ долоо дахин нэмэгдэж, унадаг дугуйн замуудтай болж эхэлсэн гээд тодорхой үр дүн гарч байгаа билээ. Тухайлбал, Үндэсний цэцэрлэгт хүрээлэн, Дүнжингаравын урд зам, Архангай, Орхон, Ховд аймаг, мөн зуслангийн зарим чиглэлд хүртэл унадаг дугуйн замтай болоод байна.
Тиймээс унадаг дугуйн зам барьж бүтээн байгуулалт хийсэн байгууллагууддаа дугуйчид талархлаа илэрхийлэх юм байна. Тодруулбал, Монголын Залуучуудын Холбоо, Нийслэлийн замын цагдаагийн газар, Залуу дугуйчин клуб, Nice bike клуб хамтран шинээр баригдсан бүх унадаг дугуйн зам дээр талархлын парад хийхээр болсон байна.
Монголын Залуучуулын холбоо 2015 оныг “Бүтээе” уриан дор олон төрлийн бүтээлч ажлууд хийж байгаа бөгөөд унадаг дугуйн зам барьж байгуулж, унадаг дугуйчдын төлөө бүтээн байгуулалт хийсэн албан байгууллагуудад талархаж унадаг дугуйн парадаар талархлаа илэрхийлэх аж. Мөн унадаг дугуйн замтай болсон Архангай, Орхон, Ховд зэрэг аймагт унадаг дугуйн парад хийхээр төлөвлөжээ.
Унадаг дугуй хэрэглэхэд тулгамдаж буй асуудлыг судлахад Унадаг дугуй зам, Унадаг дугуйн хулгай, Унадаг дугуйн зогсоол гэх мэт асуудлууд эхний 3-т жагссан байна. Унадаг дугуйг эко тээврийн хэрэгсэл гэдгээр дэлхий даяар хүлээн зөвшөөрч, унадаг дугуйн зам, хууль эрх зүйн орчин, зогсоол, соёл хөгжсөн улс орон, хотуудыг эко хот хэмээн нэрлэж байгаачлан Улаанбаатар хот маань удахгүй эко хот болно гэдэгт итгэлтэй байна.
