Өглөө.мн Шинэ өглөө, Шинэ мэдээлэл
Зуны дэлгэр өдрүүд ч эхэллээ, зэрэгцээд улиасны хөвөн ч гарлаа. Зун цас орж байгаа юм шиг хаа сайгүй хөглөрч, халуунд наршиж ядаж байхад хамар ам луу орж, хоолой ам загатнуулахаас эхлээд зарим нэг нь харшил хөдөлгөлөө хэмээн масктай нөхөрлөх болсон.
Тэгвэл бидний хэлж заншсанаар модны хөвөн буюу улиасны унгирал нь эм улиасны үр бөгөөд мод үржлэг явуулж байна гэсэн үг. Улиасны унгирал буюу хөвөнг гаргахгүй зогсоох хэрэгтэй гэж мэргэжлийн бус олон хүмүүс хэлдэг ч энэ хөвөнг зогсоох аваас модод гундаж үхэхэд хүрдэг гэнэ.
Улаанбаатар хотод 8000 ширхэг улиас байдгаас 5000 орчим нь эм улиас учраас бланс алдагдаж хөвөн ихээр гарахад гол нөлөө үзүүлдэг. Тиймээс өнгөрсөн жилээс эхлэн улиасны хөвөн гарахгүй байх талаас шат дараатай арга хэмжээ авч, улиасны мөчрийг тайрах, эм улиасны молцогийг түүх ажлыг хийж эхэлсэн байна.
Гэвч энэ жилийн тухайд бороо орохгүй, хуурайшилт ихтэй байгаагаас улиасны молцог задарч унгирал ихээр гарахад гол түлхэц болжээ.
Дашрамд дурдахад, тус хөвөн нь харшил өгдөггүй, харин ч харшил үүсгэгч бусад зүйлсийг өөртөө наалдуулж авдаг учраас хүний хамар ам луу орох нь элбэг байдаг аж. Мөн хамгийн амархнаар модтой болъё гэвэл ердөө унгирлыг газарт булахад хангалттай гэнэ шүү.
Б.Хишигдэлгэр
